Концерт 0cdc65c8-e5c9-4c5d-a0fb-68480acb8195

17 јуни, 2015

„Ту челос“ на Антички во Охрид!

Супергрупата од двајца, „Ту челос“ (2CELLOS)  на Лука Шулиќ и Стјепан Хаузер, познати како Хрватите кои го освоја целиот свет, доаѓа во Охрид на 8 август. По одличниот концерт на Илинден во 2012 година, дуото повторно ќе настапи на сцената на Античкиот театар, а концертот почнува во 21.00 часот.

Ако сакате да видите нешто навистина неверојатно, гледајте ги 2CELLOS во живо. Зачудувачки е! Не сум видел ништо повозбудливо од времето кога во ’60-те го гледав Џими Хендрикс“, вели Сер Елтон Џон за „Ту челос“.

Маестралните „Ту челос“ во светот „експлодираа“ како Јутјуб сензација во 2011 година, по видеото во кое на две виолончела свират преработка на Мајкл Џексон. Скромниот и јасен спот за десетина дена беше прегледан 3 милиони пати и… останатото е историја. Виртуозите од малата Хрватска се вивнаа во поп светот, следуваше гостување во ток шоуто на Елен Деџенерис (два пати во само шест месеци) и појавување во емисијата на Џеј Лено. Шулиќ и Хаузер како „Ту челос“ гостуваа и во екстремно популарната музичка серија „Glee“ (Гли), во чија историја влегуваат како првите гости со инструменти во вокалното шоу. Токму таа изведба на „Smooth Criminal“ на кралот на попот, во придружба на актери од „Glee“ дебитираше на Жешката Билборд Топ 100 листа на неверојатното 10. место.

Во Јапонија се најмногу познати, каде што добија награда за најдобар инструментален албум во 2014 година. Во Македонија ќе дојдат после целомесечната турнеја низ Земјата на изгрејсонцето, а дополнително ќе настапат и во Кореа, Сингапур и Хонк Конг. Во последнава година бележат настапи по најважните европски музички центри – Берлин, Милано, Лондон, Виена…. инаку на домашен терен во арената „Лисински“ во Загреб, закажаа еден концерт кој што беше веднаш распродаден, па мораа да закажат втор.

Но, ништо не може да се спореди до учеството на Лука и Стјепан во светската турнеја на Сер Елтон Џон и неговиот бенд, во кој Хрватите беа вклучени по силно инсистирање на самиот Елтон. „Ту челос“ беа дел од „ол стар“ составот на Сер Елтон Џон на стотици настапи по светот и задолжително се појавуваа на концертите на англискиот хитмејкер во хотелот „Сизарс палас“ во Лас Вегас.

До сега имаат издадено три албуми: „2CELLOS“ во 2011-та, „In2ition“ (Интуишн) во 2013-та, плоча потпишана од славниот Боб Езрин, продуцент кој соработувал со „Пинк флојд“, Питер Гебриел, Лу Рид и многу други. На овој албум на „Ту челос“ гостуваат Стив Ваи, Наја Ривера, Ланг Ланг (со кого соработуваа и за новиот албум) и Цукеро и секако Сер Елтон Џон. На почетокот на годинава го издадоа третиот – „Celloverse“ (Человерс) каде покрај преработките на поп песни во препознатливиот стил, Лука и Стјепан додадоа и авторски материјал, a тоа е насловната тема, чиј штотуку објавен видео запис Ве очекува во продолжение.

Она што е еднакво импресивно за Лука и Стјепан е величината на нивната кариера во сериозната музика. Двајцата многу мали почнуваат да свират, се развиваат како исклучителни таленти и двајцата се образоваат во елитни училишта и академии во Британија и САД. Националните хрватски и меѓународни награди на Лука и Стјепан не се бројат, а нивната виртуозност со воодушевување е прифатена и од кралеви и кралици и од принцеви и принцези. Речиси и да не постои престижна концертна сала во светот каде момците не измамиле громогласни аплаузи. Од Нов Зеланд до Америка, „Ту челос“ се прифатени со восхит и неверување во нивниот музичко сценски капацитет. „Ту челос“ се познати по огнената енергија и неизмерната љубов кон музиката која не можат да ја сокријат на сцена.

Многу специфично е дека академски музичари со светски признанија за достигнувања во класичната музика криеле таков талент за таков настап и анимација на илјадници луѓе на концерти, генијален хумор и беспрекорна спонтаност. Опуштени и секогаш подготвени да ја доведат публиката во еуфорија.

Билетите за настапот на „Ту челос“ ќе чинат 800, 1.000 и 1.200 денари, а ќе можат да се набават во продажната мрежа на МкТикетс како и онлајн.



Врати се горе ↑