Концерт ImageProxy (1)

1 август, 2014

Светската атракција „Вока Пипл“ на Охридско Лето‏

Во рамките на програмата на Охридско Лето 2014, вечерва (петок 1 август) со почеток во 20.30 часот на сцената на „Антички Театар“ во Охрид гостува „ВОКА ПИПЛ“ (The VOCA PEOPLE) – сензационалниот перформанс на музичката комедија која комбинира восхитувачки и неверојатни вокални звуци. За прв пат во Македонија, пред публиката на Охридско Лето, „ВОКА ПИПЛ“ утре ќе го претстават своето шоу кое ширум светот важи за незаборавно искуство.

Во концептот на програмата на 54-тото издание на фестивалот Охридско Лето, покрај квалитетна програма со учеството на светски познати уметници и ансамбли, голема креативна енергија се посветува и за вклучување на атрактивни фестивалски настани кои ќе го привлечат вниманието на младата и пошироката популација. Во изминатите години реализиравме концерти на вокални ансамбли, како Свингл Сингерс, Перпетуум Џезиле, Вива Вокс, кои останаа запаметени не само во меморијата на посетителите, туку и во фестивалската историја. Оваа година нудиме уште поголема  воклна атракција, „Вока Пипл“. За прв пат во Македонија, пред публиката на Охридско Лето, „Вока Пипл“ ќе го претстават своето шоу кое ширум светот важи за незаборавно искуство кое ја спојува музичката брилијантност со многу хумор. Овој ансамбл, кој потекнува од Израел, претставува нов феноменален интернационален вокално-театарски перформанс кој ги комбинира восхитувачките вокални звуци и „а капела“ пеењето со уметноста на модерниот битбокс кој ги имитира звуците на цел оркестар – тапани, труби, гитари и други инструменти и музички ефекти. Сето ова „Вока Пипл“ го прават без употреба на било кој музички инструмент на сцената, настапувајќи при тоа со хумористичен перформанс, анимирајќи ја и самата публика.

Во изминатите фестивалски вечери имавме можност да чуеме виртуози на пијано, виолина, виолончело, а вечерва ќе ги чуеме златните гласови на членовите на „Вока Пипл“, виртуозите на вокалните способности и битбоксот. Или како што вели светската музичка критика: Ова шоу ги премeстува сите граници и култури, забавно, интересно и феноменално! Не го пропуштајте!“ – изјави музичкиот селектор на Охридско Лето, Гордана Јосифова Неделковска.

Охридско Лето со овој концерт го има задоволството својата долгогодишна историја да ја надополни со уште еден феноменален интернационален перформанс кој откако ги освои срцата на публиката широм светот, конечно за прв пат ќе биде дел и од концертните доживувања на македонскиот аудиториум.

 

Покрај тоа, задоволството е уште поголемо знаејќи дека возбудата за оваа средба е подеднаква и кај нашите гости кои ги пречекуваме вечерва во Охрид. Пред нивното прво запознавање со Македонија и македонската публика, „Вока Пипл“ за македонските медиуми изјавија дека се особено возбудени бидејќи слушнале убави работи за нашата прекрасна земја и особено нејзиниот музикален народ. Инаку, претставувајќи се како група вонземјани од музичката планета „Вока“, членовите на „Вока Пипл“ порачуваат дека секаде доаѓаат со единствената порака – правете повеќе музика и помалку војна!

ВОКА ПИПЛ“ на сцената презентираат нови музички аранжмани и нивна уникатна примена користејќи повеќе од 70 најпознати хитови, песни и мелодии на сите времиња. Нивното шоу освои огромен успех за многу краток период. За само 3 години тие имаа повеќе од 50 милиони прегледувања на „Јутјуб“ и распродадоа повеќе турнеи низ Европа, Северна и Јужна Америка и Далечниот Исток. Шоуто привлече повеќе од милион посетители низ светот и цела година беше дел од „Оф-Бродвеј“ театарот во Њујорк.

Имено, во 2012 година „ВОКА ПИПЛ“ ја освоија наградата „Лосил Лортел“ (Locile Lortel award) за „Извонредно алтернативно доживување“ која ја доделува „Оф-Бродвеј“ театарот во Њујорк, САД. Година дена претходно тие беа номинирани и за француската „Глоб де Кристал“ (Globes de Cristal) награда, во категоријата за „Најдобра музичка комедија на годината“.

„Вока Пипл“ за себе велат дека се вонземјани кои потекнуваат од далечната планета „Вока“ на која главниот начин на комуникација не е говорот, туку пеењето, звуците и вокалната експресија. Нивното мото е „Животот е музика и музиката е живот“. Со впечатлив изглед во комплетно бели костуми, со исклучок на нивните црвени усну, тие патуваат низ вселената во нивниот вселенски брод кој е придвижуван единствено од моќта на музиката и не случајно пристигнуваат на планетата Земја.

ВЛЕЗНИЦИТЕ СЕ ВЕЌЕ ПУШТЕНИ ВО ПРОДАЖБА

Влезниците за овој концерт се веќе достапни во продажната мрежа на МКтикетс, како и на билетарата во дирекцијата на Охридско Лето, по цена од 600, 800 и 1000 денари, во зависност од распоредот на седење.



Врати се горе ↑