Македонија 542042_2112929720013_672895290_n

22 декември, 2012

Струмичката гимназија со мјузикл за Тоше Проески

Голем хуманитарен новогодишно – божиќен мјузикл (концерт) „Музика без хуманост и граници“ ќе се одржи на 4-ти јануари во Струмица. Гимназијалците од струмичкото средно училиште „Јане Сандански“ во салата на НУЦК „Антон Панов“ ќе изведат 35 песни на Тоше Проески собрани во 80-минутен мјузикл.

„Годинава учениците ќе ја реализираат долгопосакуваната идеја за чествување на музиката и делото на најголемиот хуманист. Овој концерт се подготвува со огромно задоволство и љубов бидејќи не води хуманоста на Тоше Проески. Преку пеење, свирење, глума и танц ќе ја искажеме својата почит кон великанот и ќе одиграме неколку сегменти од неговиот живот“ – вели диригентот на хорот при СОУ „Јане Сандански“.

Струмичката гимназија и Младинскиот совет од Струмица веќе трета година организираат хуманитарен концерт во јануари со различни празнични тематики. Учество на концертот ќе земат над 70 ученици од хорот, оркестарот, драмската секција и балетските групи од училиштето „Јане Сандански“.

Влезницата е симболична, со подарок под елката која ќе биде поставена пред големата сала, а средствата ќе бидат наменети за загрозени семејства на кои им е неопходно внимание и љубов во периодот на празниците. Во продолжение слушнете како звучи хорот на оваа гимназија со изведбата на македонскиот евергин „Кажи зошто ме остави“.

 



Врати се горе ↑