Македонија

21 септември, 2018

Познати изведувачите и песните за „Макфест 2018“

Покрај подготовките за штипската „Пастрмајлијада 2018“, во тек се и финалните подготовки за 33. издание на фестивалот на музика „Макфест 2018“. Штип е подготвен да одржи уште едно издание на популарната манифестација, која треба да започне на 4 октомври.

„Песните и авторите се веќе познати. Вкупно 32 композиции, познати имиња од македонската забавна сцена, но и нови лица кои бараат место на естрадата. Следи фаза на изработка на цеде со сите песни, така што до почетокот на фестивалот ќе бидат реализирани сите планирани задачи“, вели Владимир Дојчиновски, уметнички директор на „Макфест 2018“.

Од технички аспект, веќе се работи на логистичкиот дел на фестивалот.

„Традиционално, големата сала на Домот на културата ’Ацо Шопов’ ќе биде комплетно подготвена за фестивалот. Се договараат последните финеси околу сцената, звукот, преносот и веќе од идната недела комплетно влегуваме во реализација на ’Макфест’. Останува публиката и Македонија да слушнат нови 32 композиции од домашната продукција“, изјави Кирил Панајотов, технички раководител на фестивалот.

Ѓоко Танески, Наташа Малинкова, Мартинијан Кириловски, Џокси, „Тајфата“ и Димитар Адоновски, Дани Димитровска, Антонија Гиговска се само дел од позвучните и поискусни имиња на „Макфест 2018“. Драган Ристов, шеф на прес-центарот, најави дека на 25 септември (вторник), во хотелот „Александар Палас“ (тениско) со почеток во 12.00 часот ќе се оддржи првата прес-конференција.

Ги повикуваме сите новинари, сите медиуми, од радијата, телевизиите и порталите, да повелат на прес-средбата и да ги запознаеме со сите новитети околу ’Макфест 2018’ и уште еднаш заеднички да напишеме убава приказна за фестивалот и за македонската музика“, рече тој.

Традиционално, на првата прес-конференција ќе биде извлечен и редоследот за изведувачите на првата фестивалска вечер. Преносот на фестивалот е на првиот канал на МТВ со почеток во 20.30 часот.

Извор: МИА



Врати се горе ↑