Галерија 20

25 декември, 2016

Официјално започна новогодишниот базар „Подари среќа“

Сабота, 24.12.2016, се отвори портата на Новогодишниот базар „Подари среќа“ на улица Македонија. Во утринските часови стотици граѓани уживаа во новогодишната парада со Дедо Мраз и Снежната кралица. Нивниот настап ќе продолжи во текот на целиот базар кој ќе трае до 31 декември. Детската програма ќе биде надополнета и со настапи на „Поточиња“ и „Златно славејче“, многу детски игри, изведби на претставата на Брашко, дружби со Петко и со магичното шоу на Иван.

5

„Во ова магично катче на улица Македонија веќе се чувствува енергијата и топлата атмосфера која ја носат празниците. Овие 8 дена целиме кон зацврстување на новогодишниот дух. Со името „Подари среќа“ сакаме да го истакнеме мотото на новогодишниот базар, дека сите треба да си подариме среќа и радост со најблиските и пријателите. Базарот ќе продолжи со исто темпо и во наредните денови кога најмалите ќе продолжат да се забавуваат во детското катче и останатите ќе се загреваат со одлична музика во попладневните часови“, истакна Вера Бошковска, директор на Конгресен центар „Александар Македонски“. Таа додаде дека ги покануваат сите граѓани да подарат среќа и на децата од СОС Детското село кои продаваат хуманитарни честитки на базарот и од кои средствата се донираат за подобар живот на децата без родители.

2

Првиот ден во попладневните часови, програмата „после работа“ ја отворија „Бекдор бенд“ и Сара Мејс. Стотици граѓани ја слушаа нивната музика, се стоплија со греено вино и топла храна и уживаа во празничната атмосфера. Следните денови попладневната програма ќе ја исполнат „КонТру диџеј“, „Брас брадрс“, „Бета хаус“, „Ај кју“, Дамјан Пејчиноски, „Тајфата“ на Коки, „Скопски тамбураши“ и „Тумбао салса бенд“, а музика ќе пуштаат диџеј Бранчез, диџеј Дела, диџеј Боби, диџеј Синиша и диџеј Матс.

8

Посетителите на базарот ќе можат да купуваат рачно изработени предмети, плетени изработки, новогодишни украси, дрвени очила, божиќно цвеќе, козметика од природни состојки, чоколада, и многу други производи со кои ќе ја споделуваат својата среќа.

Денес, недела, во 12.00 часот започнува и традиционалната Дедомразовска трка во организација на „Прв до врв“, кога стотици Дедомразовци ќе се натпреваруваат на патека долга 2 километри. Новогодишниот базар „Подари среќа“ е под покровителство на Град Скопје и во организација на Конгресен центар „Александар Македонски“.



Врати се горе ↑