Македонија

11 август, 2018

Фестивалот „Десонанц“ ќе биде домаќин во клубот „Грисмуле“ во Берлин

Македонскиот електронски фестивал „Десонанц“, кој годинава обележува 10 години од основањето, на 15 август ќе биде дел од маратонска берлинска журка која се одржува во вториот најголем клуб во Берлин, „Грисмуле“. Претставниците од „Десонанц“, освен што ќе настапуваат и ќе го промовираат концептот на македонскиот фестивал, тие ќе бидат и куратори на интернационалната програма.

„Ова претставува голем и значаен чекор кон приближувањето на берлинската електронска сцена и отвора можности за понатамошни соработки, не само за екипата на ’Десонанз’ туку и на сите наши чинители на електронската сцена“, велат од фестивалот.

Журката е во организација на клубот „Грисмуле“, чие име значи мелница, и кој има култен статус во Берлин. Тој е еден од првите клубови што избегаа од локалниот звук на Берлин и се заинтересираа за странски издавачки куќи, и најголемата издавачка куќа во Германија за електронска музика „КилеКил“. Македонските диџеи кои ќе настапат се Андреј Анчевски (Андреас Херц), Мартин Чанаќевиќ (Мартчин), кои ќе претстават сет кој го опфаќа звукот на „Десонанц“. Ќе настапи и Димитар Николов (Кроном), кој веќе се пробива како еден од најквалитетните млади продуценти и диџеи на македонската електронска сцена.

Селекцијата за интернационалната екипа што ја направија од „Десонанц“ за Берлин ги вклучува артистите Онтал (Србија), Рoмек (В. Британија) и Торн Реликс (В. Британија), како главни ѕвезди кои се релативно нова супергрупа и нивното берлинско деби го прават токму преку овој настан, информираат од фестивалот.

Извор: Радио МОФ



Врати се горе ↑