7 март, 2018

ДНК со нова песна и видео како празничен подарок за дамите

Во пресрет на утрешниот празник посветен на припадничките на понежниот пол, Андреј и Панчо повторно имаат уникатно решение како истиот да им го честитаат на дамите – а како поинаку освен со песна! Станува збор за темата насловена „Пола човек“, за која веќе е снимено и видео.

Имено, „Пола човек“ е композиција со интересен призвук, зад која како автори стојат Панчо, чиј потпис е ставен на текстот, и Лазар Цветкоски, кој го направи аранжманот, додека музиката им е заедничко дело. Видеото, пак, претставува несекојдневна крими-приказна, односно раскажува за еден љубовен триаголник во кој еден мами, а другиот е измамен. Главните улоги очекувано ги имаат Панчо и Андреј, и атрактивната Олгица Стрика од Куманово, а покрај нив уште се појавуваат и неколку мошне интресни ликови, како Буцо Битбокс, Давор Минчоров и Влатко Спиров. Спотот е снимен под режисерската палка на Александар Ристовски – Принц и на неколку интересни локации, како што е една напуштена фабрика во околината на Скопје, на отворено и во хотелот „Логин“ (Loginn). Мастерингот е направен во Лондон од страна на магичните раце на Стрики, кој работи за лондонското студио „Метрополис“. За шминката се погрижи Елеонора Марк.

„И со ова видео, кое патем ни е прво со Принц, сакавме да ја задржиме традицијата – песна и спот во исто време. Мотив во целата приказна е љубовта, па токму затоа сакавме и со неа да им го честитаме празникот на сите припаднички на понежниот пол, кои заслужуваат љубов и внимание секој ден“, велат Панчо и Андреј, а со нивниот осмомартовски подарок можете да уживате горе!



Врати се горе ↑