Настани cc64efe8-cb35-456a-ae84-c16de023d13d

26 јуни, 2015

Десетина нови изведувачи на „Д фестивал“

Во рамките на тридневната програма на „Д ФЕСТИВАЛ“, од сите различни сегменти кои таа ги вклучува, фестивалскиот камп го привлече најголемиот интерес кај посетителите кои од 17 до 19 јули во Дојран доаѓаат да го уживаат автентичниот фестивалски дух. Покрај тоа што кампот на „Д ФЕСТИВАЛ“ е сместен во прекрасниот парк на влезот во Стар Дојран и непосредно покрај езерото, во овој фестивалски сегмент е сместенa и втората фестивалска сцена, „Москито стејџ“ (Mosquito Stage) на која музичката програма ќе се одвива на 18 и 19 јули, од 12.00 до 19.00 часот. Атрактивната програма на оваа бина, ја надополнува понудата на „Д ФЕСТИВАЛ“ со десетина нови имиња грижливо селектирани за вистинско уживање на сите кои ќе се одлучат во Дојран за „Д ФЕСТИВАЛ“ да допатуваат со полна опрема за тридневниот музички маратон, во најнезависниот камп на единствената фестивалска понуда ова лето.

Во сабота (18 јули), „Д ФЕСТИВАЛ“ на оваа бина ќе ги пречека и победниците од последниот „Лузер фест, групата „Проџект 2501“ (PROJECT 2501). Станува збор за аудио/визуелен концептуален сајберкор/сајберпанк бенд од Скопје кој постои од 2011 година, a обработува научно-фантсатични и сајберпанк теми. Визуелниот дел се однесува и на нивните изведби, при што песните се придружувани од страна на визуелизации сработени конкретно за изведуваниот материјал. Инди рок звукот на младите сили од домашната сцена, на „Москито стејџ“ ќе го претстави групата „Смоук шејкерс“ (SMOKE SHAKERS) од Кавадарци, а за највеселото саботно пладне ќе се погрижи групата „Сватовски“ (SWATOVSKI). Покрај нив, оваа сцена во сабота ќе ги пречека и веќе најавените„ОРАТНИЦА“ (ORATNITZA), гостите од Бугарија со инвентивен, свеж и неверојатно креативен музички израз, како и македонските претставници „РЕТРО КАБАРЕ“ (RETRO CABARET) кои загарантирано ќе ја разиграат атмосферата на фестивалот.

Во недела (19 јули) од „Лузер фест“, на втората по големина сцена на „Д ФЕСТИВАЛ“ доаѓа и второпласираниот бенд „ТВ РЕЈЏ“ (TV RAGE). Групата постои од октомври 2012 година, а е оформена од страна на Предраг и Дамјан во подрумот на Центарот за култура во Куманово. По неколку месеци тие го комплетираат сегашниот состав со доаѓањето на Анџело Мацура на тапани. Зад себе имаат едно ЕП издание под капата на „Кран рекордс“ и „Направи заедно“ кое излезе на 5 јуни 2013 година. Единствената класификација на нивната музика велат дека е рокенрол, валкан, искрен и без никакви калкукации и предиспозиции! На „Москито стејџ“ во недела публиката ќе има прилика да ужива и во настапот на младиот скопски состав „Брука бенд“ (Brooka Band), како и настапот на Александар Пешевски. Покрај нив, своето гостување на оваа бина веќе го потврди инди-поп групата „Џун“ (JUNE) која на „Д ФЕСТИВАЛ“ ќе го донесе иновативниот и свеж звук на домашната сцена.

Редослед на музичките настапи на Mosquito Stage

18.07. – Сабота
SWATOVSKI
PROJECT 2501
SMOKE SHAKERS
ORATNITZA
RETRO CABARET

19.07. – Недела
АЛЕКСАНДАР ПЕШЕВСКИ
JUNE
TV RAGE
BROOKA BAND

Во програмата на „Д ФЕСТИВАЛ“ која ќе се одвива во рамки на камп зоната ќе можат да уживаат само оние кои поседуваат соодветна камп пропусница. Со цел да им пружиме на нашите кампери фестивалска комоција и искуство за паметење, имајте предвид дека бројот на камп места е ограничен и треба навреме да ги обезбедите вашето камп место и нараквица. Сите кои што немаат тридневна фестивалска влезница (600 ден. до 1 јули) во кампот ќе можат да влезат со камперска нараквица која ќе чини 200 ден.

Kампот на единствената фестивалска понуда летово ќе биде отворен за постетителите на 16 јули, т.е. ден пред да почне официјалната програма на 5. „Д фестивал“, во чии рамки веќе се најавени настапите на: Ману Чао Ла Вентура, Вилкинсон, Кирил Џајковски и Ти-Кеј Вондер, „Фолтин“, „Бед копи“ (Србија), „Љубојна Брас Фантази“, „Културно Уметнички Работници“, „Заа“, „Фулиш грин“, „Електрични оргазам“ (Србија), „Пи-ем-џи колектив“, „Оратница“ (Бугарија), „Џун“, „Бла бла бла…“, „Поинт бленк“, „Фјурион“ и многу други.

САМО УШТЕ 5 ДЕНА ЗА ПРОМОТИВНИТЕ ВЛЕЗНИЦИ

Остануваат само уште 5 дена пред распродажбата на влезниците со промотивни цени, како и специјалната студентска акција „4+1“, кои ќе важат само до 1 јули (среда)!

Тридневните фестивалски билети за музичкиот маратон кој ќе се одвива од 17 до 19 јули, вклучувајќи го и сместувањето на ептен независниот камп, ќе бидат достапни за 600 денари само до 1 јули. Од 1 јули цената на овие влезници ќе изнесува 800 денари.

Промотивната цена на еднодневните влезници е 250 денари за петок (17 јули) и сабота (18 јули), а 350 денари за недела (19 јули). Овие влезници од 1 јули ќе чинат 350 денари, односно 450 денари.

Покрај промотивните фестивалски и еднодневни велзници, преку продажната мрежа на МКтикетс се спроведува и специјалната акција „4+1“ наменета исклучиво за студентите во Македонија. Во рамки на оваа акција за 4 купени фестивалски влезници, петтата влезница ја добивате бесплатно, како и гратис камп за сите петмина. Сѐ што треба да направите е да го соберете вашето омилено друштво, задолжително да носите студентска легитимација и да се упатите во едно од официјалните продажни места на „Д ФЕСТИВАЛ“. За оваа акција да биде уште подостапна, „Д ФЕСТИВАЛ“ се погрижи и околу здружувањето на сите заинтересирани. Доколку не можете да се екипирате, за полесно да ги најдете вашите пајташи за на фестивалот и полесно да стигнете до единечна карта за тридневен фестивал која само до 1 јули практично ќе ве чини 480 денари, приклучете се и пишете во „фејсбук“ групата „Д ФЕСТИВАЛ 4+1“.

ЕДНОДНЕВНИ ВЛЕЗНИЦИ:
Ден 1 (17 јули) – 250 денари
Ден 2 (18 јули) – 250 денари
Ден 3 (19 јули) – 350 денари

ФЕСТИВАЛСКА ВЛЕЗНИЦА (+ бесплатен камп) – 600 денари

За деталите, посетете гo mktickets.mk.



Врати се горе ↑